Bizneset zhvendosen drejt bregdetit dhe periferisë së Tiranës, tkurren në 19 bashki

Numri i ndërmarrjeve aktive në Shqipëri vijoi të rritet gjatë vitit 2025, por zhvillimi ekonomik po përqendrohet gjithnjë e më shumë në Tiranë, zonat bregdetare dhe bashkitë pranë kryeqytetit.

Ndërkohë, një pjesë e madhe e bashkive të vogla po përjetojnë rënie të aktivitetit ekonomik.

Të dhënat e INSTAT tregojnë se harta e sipërmarrjes në vend po bëhet më e polarizuar. Nga njëra anë janë Tirana, Durrësi, Kamza, Lezha dhe bashkitë turistike të jugut, ku numri i bizneseve po rritet me ritme të shpejta. Nga ana tjetër, shumë bashki në juglindje, veri dhe zonat malore po humbasin ndërmarrje aktive, si pasojë e emigracionit, plakjes së popullsisë dhe zhvendosjes së investimeve drejt zonave me potencial më të lartë zhvillimi.

Himara dhe Saranda udhëheqin rritjen

Himara shënoi rritjen më të fortë të numrit të bizneseve aktive në vitin 2025, me 15.6% më shumë krahasuar me një vit më parë. Numri i ndërmarrjeve në këtë bashki arriti në 869, nga 752 që ishin në vitin 2024.

Pas saj renditet Libohova me një rritje prej 16%, megjithëse mbi një bazë të vogël biznesesh, ndërsa Saranda regjistroi një zgjerim prej 10.2%, duke shtuar 290 ndërmarrje aktive neto gjatë vitit.

Rritja në këto bashki lidhet kryesisht me zhvillimin e turizmit, investimet në akomodim, bare, restorante, shërbime dhe aktivitetet e tjera të lidhura me ekonominë turistike. Riviera shqiptare vijon të mbetet një nga zonat me ritmet më të larta të hapjes së bizneseve të reja.

Periferia e Tiranës tërheq gjithnjë e më shumë biznese

Ndër bashkitë me performancën më të mirë renditen edhe zonat pranë kryeqytetit. Kamza regjistroi një rritje prej 9.2%, duke shtuar 348 ndërmarrje aktive, ndërsa Shijaku dhe Lezha shënuan secila një rritje prej 8.9%.

Këto bashki po përfitojnë nga zgjerimi urban i Tiranës, kostot më të ulëta të tokës dhe magazinimit, si edhe zhvillimi i aktiviteteve logjistike, tregtare dhe të ndërtimit. Zhvendosja e bizneseve drejt periferisë është bërë një prirje gjithnjë e më e dukshme vitet e fundit.

Tirana mbetet qendra kryesore ekonomike

Pavarësisht zgjerimit të aktivitetit në bashkitë përreth, Tirana vazhdon të dominojë ekonominë shqiptare. Gjatë vitit 2025, kryeqyteti shtoi 2,714 ndërmarrje aktive, duke përfaqësuar pothuajse një të tretën e gjithë rritjes neto të bizneseve në vend. Numri total i ndërmarrjeve aktive në Tiranë arriti në 58,634.

Pas Tiranës renditen Durrësi me 412 biznese të reja, Kamza me 348, Shkodra me 304, Saranda me 290 dhe Elbasani me 258 ndërmarrje aktive më shumë krahasuar me vitin 2024.

Në 19 bashki numri i bizneseve u tkurr

Nga ana tjetër, 19 bashki, ose rreth 31% e totalit, regjistruan rënie të numrit të ndërmarrjeve aktive gjatë vitit 2025.

Rënia më e madhe relative u shënua në Pustec, me 22.7%, megjithëse ndikimi ekonomik mbetet i kufizuar për shkak të numrit të vogël të bizneseve.

Ndër bashkitë me peshë më të madhe ekonomike, Maliqi humbi 49 ndërmarrje aktive, ose 9.3% të totalit, Pogradeci 74 biznese, ose 4.7%, ndërsa Dropulli regjistroi një tkurrje prej 8.5%. Rënie u evidentuan gjithashtu edhe në Pukë, Kolonjë dhe Skrapar.

Emigracioni dhe mungesa e fuqisë punëtore ndikojnë në biznes

Sipas të dhënave, emigracioni dhe plakja e popullsisë po reduktojnë bazën e konsumatorëve dhe fuqinë punëtore në zonat periferike të vendit. Bizneset e vogla, veçanërisht ato që operojnë në tregtinë me pakicë dhe bujqësi, po përballen me vështirësi në gjetjen e punonjësve dhe në ruajtjen e rentabilitetit.

Kjo po thellon më tej përqendrimin e aktivitetit ekonomik në zonat urbane dhe turistike, ku kërkesa, investimet dhe mundësitë e zhvillimit mbeten dukshëm më të larta.

Burimi: Monitor

Më të lexuarat